BULEGO POP talde bat baino gehiago gara. Bizitzarekiko jarrera bat da proiektu honekin helarazi nahi duguna. Askatasuna oinarrian izanda, nork
bere bidea eraiki eta gozatzeko deia egin nahi dugu gure musikaren bitartez. BULEGO, bizitza bere erpin, gorabehera, gailur eta lautadekin sentitzeko bultzada bat izatea dugu helburu.
Gure inguruan hainbeste aldiz eta hainbeste eratan baztertua izan den POPa da barrutik irteten zaiguna, egiten duguna eta aldarrikatzen duguna. Genero musikalekiko dauden aurreiritziak iraganeko kontua direla sinesten dugu eta horregatik senari jarraika sortzen ditugu gure kantuak, bai letra eta bai musikan zerbait sentiarazten digun horri tokia eginez.
Bada, gainera, kantuez haratago joateko asmo bat gure baitan eta hor sortzen da gure proiektuaren diziplinarteko izaera. Arlo desberdinetako
profesionalekin elkarlanean aritzen gara proiektuaren pausu bakoitzean musikatik haratago doan esperientzia bat eskaini ahal izateko. Kontzertu bat kantuak entzutea baino gehiago da, kantuak musika eta letra baino gehiago dira eta BULEGO musika talde bat baino gehiago gara.
2019an hasi ginen BULEGOrekin eta dagoeneko urte luzez panoraman dauden taldeen berezkoak diren esperientziak bizitzeko aukera eskaini
digu proiektu honek. Bilbo BBK LIVE, SONORAMA, EHZ festibala, Donostia festibala, Ezcafest bezalako festibaletan egoteaz gain, Bilbo Aste Nagusiko Abando Ibarra Plazan edo Santurtziko festetan aritu gara kontzertuak eskaintzen. Gainera, gure mugetatik haratago, Finlandian, Madrilen, Bartzelonan, Zaragozan, Galizian eta Asturiasen egon gara besteak beste gure musika eskaintzen.
Denbora tarte laburrean bizi izan dugun esperientzia honek indarrez betetzen gaitu aurrera begira dauden proiektuetarako. BULEGO hasi besterik egin ez dela sentitzen dugu, asko dugu esateko, asko dugu elkarrekin sentitzeko, asko dugu aurretik.